Tuesday, January 03, 2012

නෙළුම් විල

නෙළුම් විල

සිහි කරමි දුකෙන් සහ සතුටෙන්..

Posted: 03 Jan 2012 02:28 AM PST

''දහනමයේ ටිකට් එක ..

කොහෙද විස්සෙන් ඉතුරු රුපියල ''

ඉස්සර වගේ සටනට

නොයා උන්නෙමි කට වසාගෙන

කඩුපුල් මල් පිපුන මහ රෑක

යමුයි පන්සල් කී විට

''අපෝ මොන පන්සල්ද මේ රෑ''

නොකීවෙමි පෙරසේ එකටෙක

''කවදාද ආවේ අද හෙටම යන්නද

..මොකෝ මේ කොණ්ඩය කොට වෙලා ''

''රස්සාවක් නැතුව ඉඳගෙන

මක් කරනවද දවල් දවසෙම ''

''දැන් ඔය ඇවිද්දාමදිද

ගම රට ආවොතින් නරකද

හදාගෙන ගේ දොර

පිළිවෙලට ඉන්නේ කවදද ''

''පෙන්ෂන් ලැබෙන

ආණ්ඩුවේ රස්සාව

නැතිවෙලා යනවට

හැබෑටම දුක නැද්ද ??

සේරම ප්‍රශ්න පත්තර

කබඩ් වල දමා ලොක් කර

පරිප්පුයි පොතුයි එක්කම

තුනපහ හොඳින් පැක් කර

ගෙනා බඩු ඔහේ ඇත තැන තැන

කැවිලි විතරක් හෙමින් හිස් වෙන

අච්චාරු බෝතලය මත

තවම අම්මගෙ අතේ සලකුණු ඇත

''අපොයි අව්වේ සැර..

දාඩිය ඉහ කනින් බේරෙන ''

සිතෙන් සිතු එකත් වැරදිද

ලැබුණි අද මට එයට දඬුවම

අඳුරු සීතල මීදුමට බැන බැන

සිහිකරමි දුකෙන් සතුටෙන්

.......ගෙදර උණුසුම .......

Subscribe to: Posts (Atom)