බිලොග් එකතුව

Sunday, January 27, 2013

නෙළුම් විල

Posted: 27 Jan 2013 01:49 AM PST

වර්ණවත් ලැකර් වලින් පාට කල විසිතුරු දේවල් අතර .. එම්බ්‍රොයිඩර් කල සිල්ක් පසුම්බි අත පත ගාමින් පාට පාට කඩ වල ඇවිදින එක තරම් ලස්සන අත්දැකීමක් . ඒ අතට මේ අතට යන මෝටර්සයිකල් ගංගාවේ ඉඩක් හදාගෙන පාර මාරු වෙන කුසලතාවය ලබන්න අවුරුදු කීපයක් ගත වෙනවා . කහ ඉරි නැති රටේ සුදු ඉරි වලට සම්පුර්ණ ජිවන අයිතිය පවරන්න බැහැ. ඇහැක් විදිහට පාර මාරු වෙන සංකල්පය තමා අනුගමනය කරන්න ඕන .

මන් මේ කියන්නේ හැනොයි පරණ ටවුම . පරණ ටවුම කියල මන් සිංහලෙන් කිවේ ''ඕල්ඩ් ක්වාටර් '' එහෙම නැත්නම් ''ෆ්‍රෙන්ච් ක්වාටර් '' කියල හඳුන්වන ඒ මේ අතට විහිදුන කුඩා මාවත් සිය ගණනකින් සෑදුන නගර කොටස .

මේ පාරවල නම් සැදී තියෙන්නෙත් විකිනෙන දේවල් අනුව ..සේද කඩ ..සපත්තු කඩ වගේම සෙල්ලම් බඩු වලටත් පාරක් තියෙනවා . මේකෙන් කියන්නේ නැහැ අනික් පාරවල ඒවා නැහැ කියල . නමුත් මුලිකව මේ මේ දේවල් තියෙන කඩ වැඩියි අදාළ පාරේ ..පහසුව තමයි එහෙ මෙහෙ රස්තියාදු නොවී තමන්ට ගන්න තියෙන දේ තියෙන පාරට කෙලින්ම යන එක . ඒ වගේම තමන්ට උවමනා නැති පාරවල් මග අරින එක. ඒ කියන්නේ ළමයි එක්ක යනවා නම් සෙල්ලම් බඩු පාරෙන් නොයා ඉන්න එක .

මේ කුඩා විදි එකිනෙකට සම්බන්ධයි දැලක් වගේ . හැබැයි මට නම් තවම ඔය හැම පාරකම යන්න ලැබිලත් නැහැ . මේ ප්‍රදේශයේ තමයි ''බැක් පැක් '' හෝටල් හෙම වැඩි හරිය තියෙන්නේ . ඒ වගේම අර කලින් කි ඉබ්බන්ගේ විල ආසන්නව පැතිරිලා ඇති නගරයේ ලස්සනම කොටසත් මෙයට යාබදයි . ඒ කියන්නේ මේ තමයි සංචාරක ආකර්ශනය ප්‍රධාන වශයෙන්ම . විලට ආසන්නයේ නම් අපේ කොටුව වගේ . පැරණි ප්‍රංශ ගොඩ නැගිලි හරියට අර කොටුවේ කාගිල්ස්

එක තියෙන හරිය වගේ . ප්‍රමාණය නම් සසඳන්න අමාරුයි .

ඉතින් මෙයාකාර වැල්වටාරම් කීවට අද මේ පින්තුර ටික තමයි පෙන්නන්න ඉන්නේ . මේ ටික ගත්තේ මගේ වාර්ෂික ගෙදර යාමේ ගමන් නිමිති කොට හැමදාම කෙරෙන විදි සංචාරය වෙලාවේ .

මේ පාර නම් මුකුත් ගෙනියන්නේ නැහැ කියන සිතුවිල්ල හැමදාම යන්න ලං වෙද්දී දිය වෙනවා . මේ කඩ වල රස්තියාදු වෙලා මොනවා හරි එකතු කරන එක පුරුද්දක් වෙලා . යමක් නොදී බැරිම අය ඉන්නවනේ .

ඔන්න ඔහොම ඇවිදිද්දී ගත්තු පින්තුර ටික බ්ලොග් එකේ දමන්න හිටියට මාස ගණනක් ගත වුනා . මේ පින්තුර වල වෙනම බ්ලොග් එකක් ලියන්න දේවල් තියෙනව එකින් එක ගත්තොත් . ඒ වුනාට මට කම්මැලියි .!!!!!!!!

හරක් අං වලින් සාදන ලද දුම් බට . මෙයින් කොහොම දුම් පානය කරනවාද කියා නම් දන්නේ නැහැ .

හැබැයි මේ ගොල්ල දුම් බොන්න නම් රුසියෝ . දවසක් ප්ලාසිටික් හිස් බිම බෝතලයකින් හදාගත් මෙවැනි දුම් බටයකින් දුම් බොනවා දැක්ක ඈත පළාතකදී .

මෙය හරක් ඇටයකින් හැදු දුම් බටයක්

ලැකර් පාට කල චීන බෝනික්කෝ

කුඩා මේස දරනු

බම්බු වලින් සාදන ආහාර බඳුන්

සිල්ක් බහලුම් . මේවා කුඩා පසුම්බි .

මේවාත් බම්බු දිසි

නයි සහ ගෝනුසු වයින් . මේ බෝතල් ඇතුලේ සර්පයින් දරන ගසාගෙනම මිය ගිහින්

කද ..මෙහි කුඩය එල්ලා ඇත්තේ ලි වලින් . ලනු වලින් නොවේ .

ලැකර් මල් බඳුන් .

වරක් අපේ දියණිය අතින් අපේ අක්කාගේ නිවසේ ඈට සිසුවියන් තෑගී කල මැටි බඳුන බිම වැටි බිඳුනා .මා මෙයින් එකක් ගෙනගොස් දුන්නේ ආයේ එවන් කරදර නොවෙන්නට

මේ මල් නුලෙන් මසා ඇත්තේ

ආභරණ පෙට්ටියක් . ලොක් එක තමා බත් කුරා

සිල්ක් කුරුල්ලෝ

රුසියන් බෝනික්කෝ

වරක් මේ බෝනික්කන් ගැන කතාවක් අසන්නට ලැබුනා . තම සොයුරිය එන තෙක් මග බලා සිටි අය්යා කෙනෙක් මේ බෝනික්කන් නිමවූ බවට . නමුත් ජාලයේ කොහේ වත් ඒ කතාව දකින්නට නැහැ . මේ බෝනික්කන් ඇතුලේ එකින් එකට බහාලු කුඩා බෝනික්කන් රැසක් සිටිනවා .

මෙවර මෙයින් එකෙක් ගෙනගිය නමුත් දීමට සුදුසු කෙනෙක් හමු වුනේ නැහැ . මා තෑගී දෙන්නේ ඒ ඒ අයගේ රුචිය අනුව .

මේ කඩය විශේෂයි ..අහම්බෙන් නෙත ගැටුනේ . වියට්නාමය කොමියුනිස්ට් කරණයේදී සහ ඇමරිකන් යුද්ධයේදී නිමවුන පෝස්ටර් [ propaganda posters] මෙහිදී මිලයට ගන්නට පුළුවන් .

මේ ඉතින් දන්නා කට්ටිය . ඉන්දියන් අවන් හලක්

සිල්ක් ස්කාර්ෆ්

පන්සලක් ...
සාමාන්‍ය ජන ජීවිතය දකින්න නම් මෙවැනි විදි වල ඇවිදිය යුතුමයි . එකක් කිව යුතුය . අප මේ බ්ලොග් වල සටහන් කරන්නේ අප දකින ලෝකයෙන් සහ අත්විඳින ලෝකයෙන් අංශු මාත්‍රයක් පමණි .
මේ සටහන් වලින් කිසිවිටක මේ රට ගැන හෝ මිනිසුන් ගැන 100 %ක් අවබෝධ නොවේ .

මාගේ දෘෂ්ටි පරාසයට හසුවන සහ එයිනුත් මා මට උවමනා තරමට පමණක් ලියන කෙටි සටහන් සහ පින්තුර පමණි මා මෙහි දමනුයේ .

ලෝකයේ කළු සුදු මිනිසුන් නැතුවා මෙන්ම හොඳ නරක කියා ස්ථානද ඇත්තේ සාපේක්ෂව සිතන පතන විදිහටය. එමෙන්ම අප අත් දකින දේ අනුවය .

මගේ දැක්ම අනුව හැකිතාක් හොඳ දකින්නට කැමති නිසා මේ සටහන් බොහෝ විට හොඳ දේ ගැන පමණකි .

Monday, January 21, 2013

නෙළුම් විල

ගවුම් පොඩිත්තක් මහලා ඕනද

Posted: 20 Jan 2013 09:09 PM PST

අපේ දිහා එක එක කාලෙට එක එක දේවල් . සමහර කාලෙට මේගොල්ලන්ට උයන්න ඕන වෙනව . මගේ හට්ටි මුට්ටි ටික සාලෙට එනවා .

හිටිගමන් බෑග් වල රටේ නැති එව්වා පුරෝගෙන ලෝකේ වටේ යනවා . සාලේ සෝපාව තමයි ප්ලේන් එක . නිවාඩු යන්න කලින් දවසේ ගේ මැද්දේ නත්තල් සීයාගේ හිම කරත්තේ හදාගෙන හිටියා ..කොට්ට ටික සේරම අරගෙන .

සමහර කාලෙට සේරම අල්ලල දාල පොත් අස්සේ අතරමන් වෙනවා . ළමයි කියන්නේ අමුතුම ජාතියක් .

ඔන්න ඒගොල්ලන්ට එක පාරටම මහන්න ඕන වෙලා . මන් ළඟ තියෙනවා ඉඳිකටු නුල් බොත්තම් වගේ ඒවා දාපු පෙට්ටියක් . හදිසියකට ඉරුණු එකක් මහගන්න ඕවා ඕනනේ . කාලෙකට කලි අපේ නැන්දම්මා ඇවිත් හිටියා . එයා තමා නියමාකාරයෙන් මැහුම් පෙට්ටියක් හදල දීලා ගියේ. සමහර අය ඉන්නේ ඉඳිකටුවයි නුලයි අතේ අරන් උපන් අය . එයා අන්න එහෙම කෙනෙක් . .

එයාගේ පුතා හිතන් ඉඳලා තියෙන්නේ හැම කාන්තාවම මහන්න ආස අය කියල . පසේ එහෙම නෙමේ කියල සහසුද්දෙන්ම දැනගත්තා වුනත් කොහෙද ගිය වෙලාවක පොඩි මහන මැෂිමක් ගෙනත් දුන්නා .

වටිනා උපකරණ මොකට නාස්ති කරනවද කියල හිතල මන් ඒක කබඩ් එකකට දාල තිබ්බා .

ඔන්න මෙයාලා මහන්න ඕන වෙලා මට කිව්වා කියල දෙන්න කියල . කොච්චර ආස නැති වුනත් ඔය පොඩි මලක් මහන්න ..වාටි මහන්න ,..බොත්තමක් අල්ලන්න ...ඉරුණු එකක් ප්‍රතිසංස්කරණය කරන්න වගේම නැටි , දම්වැල් , බ්ලැන්කට් වගේ මැහුම් ජාති ටිකක් මාත් දන්නවා .

[ඒ කාලේ ගිරවු දෙන්නෙක් ඉන්න කොළ පාට ටොෆි පෙට්ටියක් තමයි මැහුම් පෙට්ටිය වෙලා තිබුනේ .]

ඒ ඉතින් සම්පුර්ණයෙන්ම ප්‍රාථමික අධ්‍යාපනයේදී අපට අනිවාර්යයෙන් මැහුම් කියල විෂයක් තිබුන නිසා .

තුනේදී හතරේදී වගේ මට මතකයි ලේන්සුවක් ..ටි පෝ කවරයක් වගේ ඒවා මහන්න සිද්ධ වුනා . ඒවායේදී එක එක මැහුම් වර්ග ඉගෙන ගත්තා . බ්ලොක් හදලා පොඩි ඇඳුම් වගේ ඒවා මහන්න පටන් ගන්න කාලේ වෙද්දී මට එපා වුනා.

මැෂින් එක මට හරිම හොඳ සෙල්ලම් බඩුවක් වුනා විතරයි. කැරකෙන රෝදේ කරකවලා අපි හරිම සතුටක් ලැබුවා .

සාමාන්‍යයෙන් සාමාන්‍ය පෙළ උසස් පෙළ කරලා ළමයි ගෙදර ඉන්න කාලයක් තියෙනවනේ . ඒ කාලවලදී ගැහැණු ළමයි මැහුම් පන්ති කුකරි පන්ති හෙම ගිහින් ඕවා ඉගෙන ගන්නවනේ ඒ කාලේ .

හැබැයි මන් එහම ගෙදර ඉඳලම නැහැ . එකක් රටේ තිබ්බ තත්වේ අනුව විභාග තිබ්බේ අමුතු අමුතු කාලවල. ගෙදර ඉන්නයි කියල කාලයක් තිබුනේ නැහැ .

හැබැයි පසු කලෙක සිංගර් එකේ මහන්න ඉගෙන ගන්න කියල එක දවසක් ගියා .ඊ ළඟ සතියේ රැකියා පුහුණුවකට යන්න වුනා .

ඔන්න ඔයාකාරයෙන් මගේ මැහුම් අධ්‍යාපනයට තිත වැටුන . අපේ අම්මට හොඳට මහන්න පුළුවන් නිසා අපට ඉගෙන ගන්න ඕන කමක් තිබ්බෙත් නැහැ .

ඔන්න ඔය කාලේ මට අහන්න ලැබුණ රෙදි පින්තාරු කරන පාට ගැන . ඔය වැඩේ නම් මට සැහෙන්න හිතට ඇල්ලුවා .
අම්මට කියල කොට්ට උර බෑග් එහෙම මස්සගෙන ලස්සන චිත්‍ර පින්තාරු කරලා යාළුවන්ට විකුණුව.
මගේ දුලගේ ළදරු ඇඳුම් පොඩි වල වැඩියම තිබුනේ පාට කල චිත්‍ර .

ඒ කර්මාන්තෙත් එහෙම්ම අභාවයට ගියා . අපේ කාලේ වෙද්දී කඩෙන් ඇඳුම් අරන් අඳින්න පුළුවන් කම ආවනේ . මහන්නේ මොකටද .

කසාදෙන් පස්සේ නැන්දම්මා උත්සාහ කළා මහන්න උගන්නන . ඒ වුනාට පිහිටන්නේ නැති දේවලුත් තියෙනවනේ කොච්චර වුනත් .

අපි ඉස්සර නවකතා වල දැකල තියෙන්නේ ආදරය කරන කාලේ කෙල්ල තෑගී දෙන්නේ අතින්ම මහපු ලේන්සු . ලේන්සු වලට ගිහින් තියෙන කලදසාව ගැන කල්පනා කරන්න වටිනවා .

අපේ රටේ නම් තවම ලේන්සු පාවිච්චි වෙන බව පෙනෙනවා . මේ රටේ නම් ලේන්සු නැහැ වගේ . කඩදාසි ලේන්සු පාවිච්චි කළා විසිකලා . අපේ ගෙදර එක්කෙනෙකුට විතරක් තවම ලේන්සු ඕන . පිරිමි තවම ලේන්සු භාවිතයෙන් මිදිලා නැහැ වගේ .

කොරියන් කතාවල කෙල්ල හඬන කොට කොලුවා සාක්කුවෙන් ලේන්සුවක් අරන් දෙනවා කඳුළු පිහාගන්න . වැඩිය ආදරේ නම් එයාම කඳුළු පිහිනවා .

පිරිමි විතරද දැන් ලේන්සු පාවිච්චි කරන්නේ කියල හිතෙනවා මට .

හරි ඉතින් පොඩ්ඩක් පාරෙන් පිට ගියා .

ඔන්න අපේ ළමයි මහන්න ඕන වෙලා මට කරදර කරලා ටිකක් ඉගෙන ගත්තා . දැන් වැඩේම මහනවා .කි දවසකටද දන්නේ නැති වුනත් මන් මේ කල්පනා කරන්නේ පරම්පරාවක් මග ඇරලා ආච්චිලාගේ ජාන මේ ගොල්ලන්ට ඇවිත්ද කියලයි.

මොකද අපේ ආච්චිලා දෙන්නම මැහුම් ගෙතුම් කරනවා මම දැකලා නැහැ . අම්මගේ අම්මා මැහුම් ගෙතුම් කලේ නැහැ . නමුත් අපේ අම්මා ඒවාට ආසයි . තාත්තගේ අම්මා එහෙම දේවල් කරනවා දැක නැහැ . හැබැයි එයා පොත් ගුල්ලියක් . නැන්දලා නම් ඉන්නවා හොඳට මහන්න දන්නා .
ඒ හින්දා ආච්චිලා අද හිටියා වුනත්

'' මොනවද දුවේ ඔය ටුක් ටුක් ගගා අකුරු කොටන වෙලේ මැහුමක් ගෙතුමක් කළා නම් නරකද'' කියයි කියා බයක් වෙන්න නම් ඕන නැහැ .

අනික් අතට පරිසරයෙන් කිසිම බලපෑමක් නැතුවත් ස්ත්‍රියට පොදු යම් යම් ලක්ෂණ කවද හරි දවසක මතු වෙනවා නේද ,

නඟා හිස පැත්තට හරවාගෙන දිවත් විකාගෙන මල් මහනවා . අක්කා වැඩිය කැමති ඉරුණු ඒවා පිළිසකර කරන්න .

හැබැයි හෙට අනිද්දා මැහුම් පැත්තකට දාලා මේ දෙන්නා වෙන මොකක් හරි කරන්න ගත්තත් මගේ නම් පුදුමයක් නැහැ . ඒ ළමයින්ගේ හැටි .

Saturday, January 19, 2013

නෙළුම් විල

තුන් කොන් ආදරේ ලිප් ගල් තුන සේමා ......

Posted: 18 Jan 2013 07:11 PM PST

එලියට බහින්නට නොහිතෙන තරම් පරිසරය සීතලයි . ශිතාධික රටවලින් ආ මිනිසුන්ට සහ මේ පළාතේ වැසියන්ට නම් එතරම් ගණනක් නැතුවා වගෙයි . කට්ට සීතලේ පාපන්දු සෙල්ලම් කරන තරුණයින් රාත්‍රී 10 11 වෙනකම් සෙල්ලම් කරනවා .

මේ මිනිස්සු කාලගුණ වෙනස්කම් ගැන බොහොම සැලකිලිමත් . ජනේලෙන් බලල මට කියන්න පුළුවන් කොච්චර සීතලද කියල කාලගුණ අනාවැකි නොබලාම . ඒ ඔවුන් අඳින ඇඳුම් දිහා බලල . යන්ට්ගම් සිතල වෙද්දීම හොඳට ඔතාගෙන එලියට බහින්නේ . එකක් ගමන බිමන මෝටර් සයිකලයෙන් නිසා සිතල සුළඟින් ආරක්ෂා වෙන්න ඕන විශේෂයෙන්ම . අනික් අතට නිදහස් බෙහෙත් හේත් නැති නිසා ලෙඩ නොවී ඉන්න එකත් සැහෙන්න වැදගත් සාක්කුවට .

ඒවායින් වැඩක් නැහැ ඉතින්. අත්‍යාවශ්‍යම දෙයකට මරන්න යනවා වගේ යන්තමට එලියට බහින උග්‍ර නිවර්තන වාසි සත්ව ඝනයට අයත් මම සතුව සැහෙන වෙලාව තියෙද්දිත් බ්ලොග් එක නොලියන්නේ මොකද කියල මන්ම කල්පනා කළා . ඔන්න ලියන්න ගන්නවා . වෙන බ්ලොග් දෙක තුනක් කියවනවා . ලියන එක අමතකයි . ආයේ අට නවය වෙද්දී ගෙදර වැඩ ඉවර නම් කෙල්ලොත් එක්ක බ්ලැන්කට් එක අස්සට රිංගා ගැනීම තමයි පරම පැතුම .

ළමයි නිදි කරන්න කියල ගියාට ආයේ මන් නම් උදේ වෙනකම් ඇඳෙන් බහිනවා බොරු . ඉතින් කවුද බ්ලොග් එක ලියන්නේ .

නිදහසට කාරණා මදැයි . අද නම් ස්ථිර චේතනාවෙන් ඉඳගත්තේ මොනව හරි කොටලා මිසක් නැගිටින්නේ නැහැ මෙතනින් කියල .

ගිය අවුරුද්දේ ලියපු ''කාප් මසෙකු පිට නැගී දෙවියන් දෙව් ලොව යති '' ලිපිය මතකද මන්දා . මට නම් මතකයි ..මම නේ ලිවේ .

එතන කියපු ලිප ළඟ දෙවියා ගැන කතන්දරේ අද උදේ සඟරාවක තිබිලා කියවන්න ලැබුණ . මෙන්න ඉතින් ඒ කතාව .

කියන විදිහට එක දෙවි කෙනෙක් නෙමේ තුන් දෙනෙක්ම ඉන්නවලු .

මේ දෙවි වරු අවුරුද්ද පුරාම ගෙදර උන්දලාගේ ගති පැවතුම් ගැන බලා ඉඳල හෙට අනිද්දා උදාවෙන මේගොල්ලන්ගේ අවුරුදු කාලෙට කාප් මාලුවෙක්ගේ පිටේ නැගල දෙව්ලොව ගිහින් දෙව් රජතුමාට සම්පුර්ණ වාර්තාව දෙනවලු .

ඔන්න එකතක් එක කාලෙක ..[ඔව් මෙහෙත් තියෙන අටෝ රාශියක් ජනකතා පටන් ගන්නේ එහෙමයි .]

හිටියාලු ඉතාම දුප්පත් තරුණ යුවලක් . අනුන්ගේ ගෙවල්වල මෙහෙවර කරලා දුක සේ කන්න වේලක් සොයා ගත්ත මේ දෙන්නා හරිම සමගියෙන් සතුටින් ජිවත් වුනාලු . කොටින්ම රත් කරගත්තු දේ කන්නවත් කල්පනාව නැහැලු ආදර ගී කියමින් ඉන්නකොට .

මෙතරම් ආදරෙන් ඉඳිද්දී එක කාලයක මහා නියගයක් ඇවිත් වතු පිටි පාලු වෙලා ප්‍රදේශයම අහේනියට පත් වුනාලු . මේ දෙන්නට වැඩක් පොලක් සොයා ගැනීම අසීරු වුනා .

සැමියා කල්පනා කළා වෙන පළාතකට ගොසින් රැකියාවක් සොයා ගන්න . බිරිඳ තමා සමග ආවොත් දුක් විඳින්න වේය කියල තමන් තනියම යන්න තීරණය කළා . බිරිඳ මේ ගැන අකමැති වුනත් සැමියා තදින්ම කියා සිටි නිසා නතර වෙන්න සිදු වුනා .

සැමියා බිරිඳට කිවේ වසර තුනකින් තමා ආපසු නාවොත් මියගොස් ඇති බව සිතා වෙන විවාහයක් කරගන්න ලෙස

ටික දිනකින් කාන්තාවට පොහොසත් නිවසක රැකියාවක් ලැබෙනවා . කෙමෙන් කෙමෙන් දුර්භික්ෂ තත්වය ප්‍රදේශ වාසීන්ට අමතක වෙනවා . දැන් සියල්ල සාමාන්‍යයි .

අසරණ කාන්තාව මග බලා ඉඳ වසර තුනක් ගෙවෙනවා . මේ අතර නිවෙස් හිමියාගේ බිරිඳ මිය යනවා . ඔහු අර කාන්තාව සරණ පාවා ගන්න කැමති වෙනවා .
නමුත් ඇය තව වසර තුනක කාලයක් බලා ඉන්නට අවශ්‍ය බව කියනව .

තව වසර තුනක් ගත වෙනවා . සැමියා පැමිණෙන්නේ නැහැ . දැන් නම් ඔහු මියගොස් දැයි ඈට සිතෙනවා .

නමුත් වසරක් වැළපීමට ඕනා බව කියා නිවෙස් හිමියාගෙන් කල් ඉලා ගන්නවා . තව වසරක් ..[දැන් වසර හතක්ම ගෙවී ගොස් ] බලා සිට අපමණ වේදනාවෙන් ඈ නව හිමි සරණ යනවා .

අවාසනාවක මහත. ..විවාහයෙන් ටික දිනකට පසු ඔහු ගමට එනවා .

කාන්තාව බොහෝ පසු තැවෙන්නේ තව ටික දිනක් ඉවසුවේ නැති බවට තමන්ටම චෝදනා කරමින්..

නමුත් පැරණි සැමියා නව යුවලට ආශිර්වාද කරනවා . නමුත් යන එන මන් නැති ඔහු පසු දින එල්ලී මිය යනවා .
මේ අසන කාන්තාව දියේ ගිලි මිය යනවා . දෙවෙනි සැමියාද ශෝකය නිසා දිවි තොර කරගන්නවා .

තිදෙනා ම දෙව් රජු හමුවට යැවෙනවා .

දිවි නසා ගැනීමට හේතු විමසීමේදී මොවුන්ගේ එකිනෙකාට තිබු ආදරය ගැන පැහැදිලා දෙව් රජතුමා ඔවුන්ට විශේෂ වාරයක් දෙනවා .

ඒ තමයි ලිප් ගල් තුනක් බවට පත් කිරීම . දර දැවෙන විට ඒ රස්නයෙන් ඔවුන්ගේ ආදරය උණුසුම් වෙන බවත් සැමදාම තිදෙනාට එකට සිටීමට හැකි වෙන බවත් ඔහු සිතනවා .

මෙයට අමතරව මුළුතැන් ගෙයි දේව තනතුරද ඔවුනට පිරිනැමෙනවා .

මොවුන් තමයි කාප් මාළුවන් පිට නැගී අවුරුද්දට දෙව්ලොව යන්නේ . නැවත එන්නේ දෙවියන්ගේ ආශිර්වාදයත් සමග .

ලිප නිවාඩු යන අපේ අවුරුදු සිරිත් සමග මේ සිරිත් කොපමණ ගැලපේද .

යලිත් කියන්නට වෙන්නේ ලෝකයේ මිනිසුන් සිතන පතන දේවල් සමපාත වෙන අපුරුව නිතරම මසිත චමත්කාරයට පත් කරන බවයි .

Saturday, January 12, 2013

නෙළුම් විල

ලේනෝ ලේනෝ මේ දත අරගෙන ...

Posted: 11 Jan 2013 08:12 PM PST

අපේ පොඩි දෝනිගේ කිරිදත් දෙකක් දත් දොස්තර ලවා ගලවා දමන්නට සිදුවිය . ඒ දත් වලට පිටුපසින් අලුත් දත් මෝදු වන්නට වූ බැවිනි .

සෙලවෙමින් තිබුණ උඩු ඇන්දේ දත් දෙකක්ම වැටි ඈගේ දඟකාර මුහුණට අහිංසක සුරතල් බවක් ලැබී ඇත .

එයින් එකක් වැටුනේ සියලාගේ ගෙදරදීය . දත ලේනාට දෙන්නයි නොයෙක් උපදෙස් ලැබුනද මගේ දත දමා යන්නට බැරි යයි කියමින් එය රැගෙන ආවාය .

අනෙක් දත ඊයේ පාසලේදී වැටුන බැවින් හෙදිය ප්ලාස්ටික් බෑගයක දමා දී තිබිණි .. ඇයටත් කුඩා මිතුරු මිතුරියන්ටත් මේ වයසේදී දතක් වැටීම යනු එක විදිහට වීර කමකි . වැඩිපුර දත් වැටීම යම් ලෙසකින් අන් අයට වඩා ''ලොකු '' බව පෙන්වන ලක්ෂණයක් ලෙස සිතන බවත් පෙනේ .

'ලේනෝ ලේනෝ මේ දත අරගෙන කැකුළු දතක් මට දියෝ දියෝ ''

අප වැටුණු කිරි දත් වහලයට විසිකර දැමුයේ ඒ ගීතයද ගයමින් බව මතකය . අදත් අපේ රටේ දරුවන් එසේ කරනවා ඇතැයි මම සිතමි .

බටහිර රටවලින් පැමිණි ළමෝ නම් කොට්ටය යට තබන දත, දත් සුරංගනාවිය රැගෙන මුදල් ත්‍යාගයක් තබා යන බව සිතා සිටිති .

වෙන වෙන සුරංගනාවන් සිටින බව ඉත සිතින් පිළිගත් මගේ පොඩ්ඩන්ට මේ දතේ සුරංගනාව ගැන නම් එතරම් පිළිගැනීමක් නැත .

කොරියන් මිතුරියක් කිවේ ඔවුන්ද දත් ලේනාට දෙන බවය . ඒ අසා අනෙක් රටවල් කෙසේ කරන්නේදැයි සොයා බලනට ආසාවක් ඇති විය .

ජපානයේ සහ කොරියාවේ අප මෙන්ම ලේනාට විසී කිරීම හෝ නිකන්ම වහලයට විසි කිරීම සිදුවේ . උඩු ඇන්දේ දත් බිම් මට්ටමින් විසි කරන අතර යටි ඇන්දේ දත් වහලයට උඩින් විසි කෙරෙත් .

එහි තේරුම උඩු ඇන්දේ දත් පහලට කෙලින් වැඩිම සහ යටි ඇන්දේ දත් උඩු අතට වැඩිම වේ .

වියට්නාමයේදී සියලුම දත් වහලයට උඩින් විසි කෙරේ .

ඇමරිකාව ඇතුළු බොහෝ රටවල ''ටුත් ෆෙයරි '' හෙවත් දන්ත සුරංගනාවගේ සංකල්පය බිහි වී ඇත්තේ ප්‍රංශ අභාශයෙනි . එහිදී මියෙකු සුරංගනාවක් වූ බවට කියවේ .

කම්බෝජියාවේදී උඩු ඇන්දේ දත් වළලනු ලබයි . යටි ඇන්දේ දත් වහලයට විසි කෙරේ .

තුර්කි දෙමාපියෝ තම දරුවාගේ මතු දියුණුව උදෙසා අදාළ ස්ථාන වල දත් වළලති .

උදාහරණයක් ලෙස තම දරුවා දොස්තර කෙනෙකු කිරීමට අවශ්‍ය නම් දත රෝහල් බිමක වැළලීම සිදුවේ .

හොඳ වෙලාවට අපට ඒ පුරුද්ද පැමිණ නැත්තේ .

මොන්ගෝලියාවේ ළමෝ දත බල්ලන්ට කෑමට දෙති . බල්ලා ශක්තිමත් සතෙක් ලෙස සැලකීම එයට හේතුව වේ .

නයිජීරියාවේ කිරි දත් ඒමේදී තෑගී පිරිනමන අතර වැටුණු කිරි දත් අට්ටාලයේ සඟවයි . මියන්ට නොකන ලෙස ගීතයක්ද ගයමින් .

ඇතැම් රටවල වැටුණු දත් රන් ආලේප කොටඅබරණ සාදයි . ඇතැම් විට වටිනා වස්තුවක් මෙන් සුරකියි .

බොහෝ විට ලේනා සහ මියා දත් වල භාරකරුවන් ලෙස සලකන්නේ ඔවුන්ගේ ශක්තිමත් දත් නිසා බවයි මගේ හැඟීම .

එමෙන්ම සුළු සුළු සිද්ධීන් සමග ඈත එපිට සංස්කෘතීන් වල එක සමාන ලක්ෂණ ගැන සොයා බැලීම අපුරු කටයුත්තකි .

එකම මුලයකින් ඇරඹි ලෝක ගෝලය පුරා විසිර ගිය මානවයා ජිවිතයේ බොහෝ අවස්ථාවන්වලදී එකම ලෙස සිතීම අපුරු නොවේද .....

ප..ලි.

වැඩිමනක් කියවීමට අවශ්‍ය අයට ...

http://suite101.com/article/the-tooth-fairy-and-other-legends-a52923

http://www.netlaputa.ne.jp/~tokyo3/e/teeth_e.html

Friday, January 04, 2013

නෙළුම් විල

වරද නුඹෙයි උන්ගේ නොවේ

Posted: 03 Jan 2013 11:41 PM PST

ගේ දොර ලස්සනට තියන්
උයන් පිහන් ළමයි බලන්
රස්සාවක් කලත් ඉතින්
ඉක්මනටම ගෙදර ඇවිත්

පාරේ තොටේ ගියත් දුවේ
යනව නෙමේ කොටට ඇඳන්

වැඩිය ඉගෙන ගන්නෙ
මොටද
හයට කලින් ගෙදර වරෙන්

හෙට බැන්දත් කොල්ල එක්ක
බයිස්කෝප් නොබල ඉඳින්

අතවරයට ලක් වුනොතින්
වරද නුඹෙයි
''උන්ගෙ නොවෙයි ''

දුෂණය වී අමානුෂික වද වේදනා විඳ මියගිය අසරණ යුවතිය ..ඔබ ගැන ලියන්නට වචන කොපමණ තිබුනත් මදිය . ඔබ පලමුවෙනියාද අන්තිමයාද නොවෙන එක එයටත් වඩා අවාසනාවකි . රත්මලානේදී සිඟිත්තන් දෙදෙනා සමග ගිනිබත් වූ තරුණ මව . පසුගිය ටිකේම ඔවැනි කතන්දර තමා අසන්නට ලැබුනේ .
ඒ අතරේ තලෙබාන්ලා ඉන්නේ ඇෆ්ගනිස්තානයේ පමණකි කියා අපට සැනසෙන්නට හැකිද . එක්තරා ආචාරියෙක් සිංහල ගැහැණු ළමයිනුත් බුර්කාව ඇන්දොත් හොඳ යයි කියා තිබිණි . එනපොට හොඳටෝම හොඳ නැත .
අරාබි වසන්තයේදී කරට කර සිටි විදි බැසි කාන්තාවෝ අද වන විට විදි වලින් අතුරු දන්ව ඇති බව කියවන්නට ලැබිණි . එම සඟරාවේම අපේ පාර්ලිමේන්තුවේදී එක කාන්තා මන්ත්රිවරියකට පිරිමි ඇමැත්තෙක් කල අපහාසයක් ගැනද ලියවී තිබිණි . දේශපාලන දැක්ම කෙසේ වුවත් මන්ත්‍රීවරියක් නම් අතිරේක අපහාස හිමිවේ .

එක බිත්තරයක් තිබුනත් එය තම්බා හතරට කපා දුන්නා මිස කොල්ලන්ට පමණක් බත් පත අස්සේ හංගා කන්නට නොදුන් අපේ අම්මා කාන්තා විමුක්තියේ පලවෙනි පාඩම කියාදුන්නාය .

කොතරම් කරදරකාරී සමාජයක් වුවත් අපේ පරම්පරාව අපේ අම්මලාගේ පරපුරට වඩා කාන්තා නිදහස අත්විඳි පරපුරකි . කාන්තා පාසලක වුව පිරිමි පාසල් සමග උරෙන් උර ගැටී සමිති සමාගම් වලදී ,,කළා උළෙල විද්‍යා දිනයන්හිදී අප කටයුතු කළෙමු . දහම් පාසලේ ගැහැණු පිරිමි බේදයක් නැතුව උගත්තෙමු . අපේ පාසල ඉතාම ජන විවිධත්වයකින් යුක්තවිය . සිංහල , බොදු . කතෝලික , මුස්ලිම් දෙමළ කෙල්ලන් අපුරුවට එක ගොඩේ සෙල්ලම් කළෙමු . මුස්ලිම් ගැහැණු ළමුන් ගවුමත් කලිසමත් ඔලුව උඩින් දැමු සුදු රෙදි කඩක් [ වැඩිවිය පැමිණි පසුව ] ඇන්ද අතර මැලේ මුස්ලිම් ළමුන් සාමාන්‍ය නිල ඇඳුම පමණි . . ඔලුව වසාගෙන ආ රෙදි කඩ අර ළමයින්ට මතක් වෙන්නේ ගෙදර යද්දීය . අද වන විට ඒ බොහෝ මිතුරියන් එක්කෝ පිටරටවලට සංක්‍රමණය වෙලාය . නැත්නම් යම් යම් රැකියාවල නිරත වේ ..

සමාජයක් යායුත්තේ ඉදිරියටය . පසුපසට නොවේ . යම් යම් කාරණා නිසා අප සමාජය ආපස්සට යන බව මට නම් සිතේ . දියුණුව ඇත්තේ රටක ගොඩනැගිලි වල උස මත වත් ටෙලි ෆෝන් කම්පියුටර ගණන මතමත් නොවේ .

මගේ මිම්මට අනුව නම් ගැහැණු පිරිමි එකසේ සිතන සමාජයක් දියුණුය කියාය . එනම් විමුක්තිය පතා විදි වල කෑමොර දීම නොවේ . දෙගොල්ලන්ම දෙපාර්ශවය දෙස ගරුත්වයෙන් බැලීමය .

මගේ වෙනත් රටවල මිතුරියන් නිතරම අසන ප්‍රශ්නයක් තිබේ . ඒ වියට්නාමයට වඩා ලංකාව දියුණුද කියාය .
කවදාවත් මට හරි හැටි පිළිතුරක් දෙන්නට බැරිවිය .

ඕනෑම ඇඳුමක් ඇඳගෙන ඕනෑම රාත්‍රියක ගැහැණු ළමයෙක්ට මගතොට යාමේ නිදහස අතින් නම් වියට්නාමය අපට වඩා සැහෙන දියුණුය . අප හෙළුවෙන් පාරේ යා යුතුය කියා නොවේ මා කියන්නේ . තැනට ඔබින පරිදි විලි වසා ගැනීම අවශ්‍ය බව මමද අදහමි .

එහෙත් එය තම තමාගේ කැමැත්ත මතය .

කොයි සමාජයේත් යම් යම් තලෙබන්ලා සිටිති .

සමාජයේ කුඩාම නියැදියක් වන සයිබරය තුලද එසේමය . ගැහැණු බ්ලොග් ලියද්දි විශේෂයෙන් පරිස්සන් වෙන්න ඕනා වේ .

පොඩි කොනක් අල්ලාගෙන පහර ගසන්නටද . හැකි නම් බ්ලොග් ලිවිල්ල එපා කරවන්නටද මේ තලෙබාන්ලා පසුබට නොවේ .
එසේ එලවා දමන ලද එක අයෙක් ගැන අද පවා විහිලු තහළු කර අමන වින්දනයක් ලබති . මලාලට වෙඩි තැබූ තලෙබාන්ලා සහ මොවුන් අතර වෙනස් කමක් මට නම් නොපෙනේ .

කොහේ හෝ දමන කමෙන්ටුවකින් කෑල්ලක් හෝ කොපි කර පොදු නාන ලින් ළඟ කුණු අපුල්ලන්නට මොවුන් හරිම කැමතිය .

ගුවන් යානයක යාම සුපිරි වැඩකි . අප හැමෝටම ජිවිතයේ විවිධ කඳු පල්ලම් හමුවේ . දුක් කරදර මෙන්ම සතුටු අවස්ථාද තිබේ . ඒවායින් අප ලියනුයේ අපට කැමති දේ පමණකි . මා මගේ දුක් කරදර ලියන්නට අකමැතිය . ලෝකයට ඇති තරම් පරශ්න තිබේ අපේ ප්‍රශ්න අවශ්‍ය නැත . එපමණකින් මේ තලෙබාන්ලා සිතන්නේ අප අමුතුම සතුන් ලෙසය .

අප ගුවන් ගමන් යන්නේ අපේ අධ්‍යාපනය නිසා ලැබුන රැකියාවන් නිසා මිස කාගෙන්වත් හොරකම් කර නොවේ . අප කජු කිරි අවධිය පසුකොට ආ බැවින් අප සමග සිටි හිත මිතුරන්ද අද වන විට විවිධාකාරයේ තනතුරු වල සිටිති. මගේ පාසල් මිතුරු මිතුරියන් අතර නීති වේදීන් දොස්තරලා , ගුරුවරුන් පත්තර කලාවේදීන් ..මෙන්ම ගෘහනියන්ද සිටිති . එය මගේ වරදක් නොවේ . ඔවුන් ගැන යමක් කි පමණින් මා අමුතු සතෙක් වේද .

පිරිමි බ්ලොග් කරුවන් අතරද නෙක අපවාදයන්ට ගොදුරු වුවන් සිටිති,. . මා මේ කියන්නේ වෙසෙසින් කාන්තා පරපුර ගැනය .
මොවුන් අප අතරම හොඳ මුහුණ පෙන්වමින් සිටින අය විය හැක . කනගාටුව එයයි .

සතුට වන්නේ මේ අතලොස්සක් තලෙබාන්ලා අතර වැඩිමනක් හොඳ මහත්වරුන් සිටිනු දැකීමය .

ගැහැණු ළමයිනි
ලියන්නට නම් බ්ලොග් එකක්
අරන් එන්න කබර හමක්
යකඩෙන් සැදු සිතක් එක්ක

ප.ලි.

කාටහරි මා ලියන දේවල් ගැන ප්‍රශ්නයක් ඇත්නම් මෙතනම ඒ ගැන කතා කරන්න තමයි මේ ලිපිය ලිව්වේ .

ආයේ අනුන්ගේ තැන්වල කතන්දර නොකියා . කමෙන්ට් මොඩරේට් කරන්නේ ඒ කියන දේවල් සභ්‍ය ලෙස පමණක් කීමට ඉඩ දීමටයි .

කරුණාකර මගේ සුහද සගයින් මේ ගැන කලබල නොවන්න . හුඟ දවසක ඉඳන් කවුරු හරි කෙනෙක් කතන්දර බ්ලොග් එකේ එක එක ඇනුම් පද කියා තිබුන . කතන්දරට පුද්ගලිකව කිවත් ඔහුට ඒවා පාලනය කිරීමට අපහසු නිසා ඒ තැනැත්තාට මා කාරුණිකව කියනව මෙතන කියන්න මා ගැන ඔබට ඇති අරෝව මොකක්ද කියල .

ඒ වගේම දැනුවත්ව කිසිවෙකුට වරදක් කර නැතත් මගෙන් නොදැනුවත්ව යමෙක්ට වරදක් වුනි නම් ඒ ගැන සමාවද ඉල්ලන බව කියන්න ඕන .

Wednesday, January 02, 2013

නෙළුම් විල

හරිම බරැති වචන තුනක්

Posted: 01 Jan 2013 06:56 AM PST

''ලංකාවට ගිහින් ආමි . ''
ලෙහෙසි පහසු වචන තුනේ වාක්‍යයකි

දුවල පැනල එකතු කරපු
සුට්කේස් පහේ තියෙන
කිලෝ අනු නමයට නම් වඩා වැඩියි
පොඩ්ඩක් හරි ..

අකුරු තුනේ බර කිරුවොත්

එල්ලා ඇති බරට බරේ
හමු වන්නට දුන් පොරොන්දු

එක වචනෙක අමුණා ඇත
අම්මලාගේ කඳුළු බින්දු

තුත්තිරි වාගේ ඇලවී
ගලවා ගනු බැරුව ගිහින්

''අනේ අපිව අරන් යන්න ''
යයි කිය කිය

පරණ පාරවල යනකොට
වැටිල තිබුන පරණ මතක

''ලංකාවට ගිහින් ආමි ''

හරිම බරැති වචන තුනකි

Monday, December 31, 2012

සිංහලෙන් අන්තර්ජාලයට පිවිසෙන්න අදියගෙ බ්ලොග් එක

Arduino Tutorials #5 - Knight Rider & For Loop

Posted: 30 Dec 2012 10:46 PM PST

මීට කලින් පළවුනු ලිපි...

#1 - Introduction
#2 - Config & IDE
#3 - Blink!
#4 - Basic Electronics

දැන් මේ වෙනකොට ඔයගොල්ලෝ හැමෝම සාර්ථකව තමන්ගේ ප්‍රථම ප්‍රෝග්‍රෑම් එක එහෙම ලියලා ඉන්නවා කියලා මම හිතනවා. අද මේ Tutorial එකෙන් මම බලාපොරොත්තු වෙන්නේ for loop එක හඳුන්වා දීම හා ඒ හරහා නයිට් රයිඩර් පරිපථයක් නිර්මාණය කිරීමයි. වැඩිය කතා නැතුව අපි කෙළින්ම වැඩට බහිමු.

Project #2 - Knight Rider Circuit!

#Hardware

මේක project එක කළින් එකෙන් වෙනස් වෙන ප්‍රධානම හේතුව තමයි මේකට එළියෙන් පරිපථයක් නිර්මාණය කිරීමට අවශ්‍ය වීම. මෙතනදී නම් අපට LED 7ක් සහ ඒ LED වලට 220ohm ප්‍රතිරෝධක 7ක් අවශ්‍ය වෙනවා. මේ LED ටික අපි Arduino Board එකේ Digital I/O 2 සිට 8 දක්වා pins වලට සවි කරන්න ඕන. මෙතනදී අපි හදන පරිපථය පේන්නේ මෙහෙමයි.

Breadboard View

මේ තියෙන්නේ ඒකට අදාල Schematic එක.

Schematic View

මේ ටික සවිකරාම ඇත්ත ලෝකයේදී පේන්නේ මෙන්න මේ විදියට...

#Software

දැන් අපි ප්‍රෝග්‍රෑම් එක ලියන්න පටන්ගමු. ඉස්සෙල්ලාම අපි මේ පරිපථයේ නිවෙන පත්තුවෙන වේගය define කරන්න ඕන. ඒ නිසා ඉස්සෙල්ලාම ඒ වේගය Int එකක් විදියට Define කරන්න.

int Speed = 100;

ඊළඟට අපි අපේ LED තියෙන පින්ස් හතම Outputs විදියට නම් කරන්න ඕන. ඒ සඳහා ක්‍රම දෙකක් තියෙනවා. පළවෙනි ක්‍රමය නම් නිකම්ම ඔක්කොම පින්ස් ටික මේ වගේ වෙන වෙනම Outputs විදියට නම් කරන එකයි.

pinMode(2, OUTPUT);
pinMode(3, OUTPUT);
.      .        . ;
.      .        . ;
pinMode(8, OUTPUT);

ඒවුනාට මේ වගේ දෙයක් කරන්න අපිට for loop එක භාවිතා කරන්න පුලුවන්. for loop එක කියන්නේ Arduino language වල තියෙන තවත් Control Structure එකක්. මේ loop එක භාවිතා කරන්නේ එකම ප්‍රකාශනයක් ( Statement එකක් ) නැවත නැවතත් Repeat කරන්න. for loop එකේ සැකැස්ම මෙහෙමයි.

------------------------------------------------------------------

Image Courtesy arduino.cc

දැන් මේ loop එක වැඩකරන්නේ මෙහෙමයි.

ඔය initialize කියල තියෙන කොටස (int x = 0; කියන කොටස) ක්‍රියාත්මක වෙන්නේ හරියටම එක පාරයි. ඒ loop එක ආරම්භයේදී විතරයි.

ඊටපස්සේ ඕකේ test කියල තියෙන කොටස මඟින් අපි දෙන condition එක පරීක්ෂා කෙරෙනවා (මෙතනදී නම් condition එක වෙන්නේ x < 100).

ඒ Condition එක True නම් (මෙතනදී නම් x, 100ට වඩා අඩු නම්) loop එකේ Statement block එක ක්‍රියාත්මක වෙනවා (මෙතනදී නම් println(x); කියන කොටස, එකෙන් x = 0 කියලා print වෙනවා).

ඒක ක්‍රියාත්මක වෙලා අවසාන වුනාට පස්සේ increment or decrement වෙලා අපි define කරපු variable එකේ අගය වෙනස් වෙනවා (මෙතනදී නම් x වල අගය 0වේ සිට 1ට වැඩි වෙනවා).

ඊට පස්සේ නැවතත් test එක වෙලා Statement Block එකට යනවා (දැන් ආපහු පාරක් initialize වෙන්නේ නෑ ) නමුත් දැන් තියෙන වෙනස නම් x වල අගය 1ක් වීමයි. (ඒ නිසා print වෙන්නේ x = 1 කියලයි).

මේක මේ විදියට දිගින් දිගටම condition එක false වෙනකන් (මෙතනදී නම් x වල අගය 99ට වැඩි වෙනකම්) ක්‍රියාත්මක වෙනවා. ඊට පස්සේ loop එක අවසාන වෙලා ඊළඟ function එකට යනවා.

-------------------------------------------------------------

දැන් අපි ඕක ගැන වැඩිය හිතන්නේ නැතුව අපි දැන් for loop එක භාවිතා කරලා 2 සිට 8 දක්වා Digital Pins outputs බවට පත් කර ගමු. ඒක කරන්නේ මෙහෙමයි.

void setup() {
  for(int ledPins = 2; ledPins < 9; ledPins++) {
    pinMode(ledPins, OUTPUT);
  }
}

දැන් Programme එකේ ප්‍රධාන කොටස වෙන LED නිවීම හා දැල්වීම කරන්න ඕනේ. අපිට මේ ටික කරගන්න for loop දෙකක් අවශ්‍ය වෙනවා. මේ loops දෙක ක්‍රියාත්මක වෙන්නේ මෙහෙමයි.

පළවෙනි loop එකෙන් LED 1 සිට 6 දක්වා දැල්වෙනවා. දෙවැනි loop එකෙන් LED 7 සිට 2 දක්වා අනිත් පැත්තට දැල්වෙනවා. මේ ටික නැවත නැවතත් Repeat වෙනකොට අපිට ඕන කරන effect එක ලබාගන්න පුලුවන්. මේ සඳහා අවශ්‍ය කරන loops දෙකේ කේත සටහන් මෙහෙමයි.

void loop() {
  
  for(int ledPins = 2; ledPins < 8; ledPins++) {
    digitalWrite(ledPins, HIGH);
    delay(Speed);
    digitalWrite(ledPins, LOW);
  }
  
  for(int ledPins = 8; ledPins > 2; ledPins--) {
    digitalWrite(ledPins, HIGH);
    delay(Speed);
    digitalWrite(ledPins, LOW);
  }
}

ඔය කේත ටික හැමෝටම දැන් තේරුම්ගන්න පුලුවන් ඇති කියලා මම හිතනවා. කලින් ප්‍රෝග්‍රෑම් එකට වඩා මේකේ තියෙන එකම වෙනස අපි digitalWrite function එක ඇතුලට කෙලින්ම pin number එක දාන්නේ නැතුව ඒ සඳහා for loop එක ඇතුලේ define කරපු variable එක යොදාගෙන තිබීම විතරයි.මේ දැක්වෙන්නේ අපේ සම්පූර්ණ ප්‍රෝග්‍රෑම් එක..

int Speed = 100;

void setup() {
  for(int ledPins = 2; ledPins < 9; ledPins++) {
    pinMode(ledPins, OUTPUT);
  }
}

void loop() {
  
  for(int ledPins = 2; ledPins < 8; ledPins++) {
    digitalWrite(ledPins, HIGH);
    delay(Speed);
    digitalWrite(ledPins, LOW);
  }
  
  for(int ledPins = 8; ledPins > 2; ledPins--) {
    digitalWrite(ledPins, HIGH);
    delay(Speed);
    digitalWrite(ledPins, LOW);
  }
}

දැන් ඉතින් දෙයියනේ කියලා Arduino බෝඩ් එක කොම්පීතරේට හයි කරලා හරියට කෝඩ් එක ටයිප් කරලා Upload button එක ඔබන්න. මේ තියෙන්නේ මම හදපු Circuit එකේ වීඩීයෝ එකක්. මගේ කැමරාවේ පොඩි අව්ලක් නිසා Audio රෙකෝඩ් වෙන්නේ නෑ :'( :'( ඒ වුනාට ඉතින් බලන්න පුලුවන්...

එහෙනම් කස්ටියටම ගුඩ්බායි... අදට පෝස්ට් එක ඉවරයි. ඕනම ජාතියක අව්ලක් ගියොත් යටින් කොමෙන්ට් එකක් දාලා අහන්න..

Arduino Tutorials #4 - Basic Electronics

Posted: 30 Dec 2012 08:52 AM PST

ඉස්සෙල්ලාම Arduino සම්බන්ධ පරණ ලිපි කියෙව්වේ නැත්නම් ඒ ටික කියවල එන්න..

#1 - Introduction
#2 - Config and IDE
#3 - Blink!

අපි දැනට Arduino හරහා අපේ පළවෙනි Project එක සාර්ථකව නිමා කරලයි තියෙන්නේ :) මීට වඩා සංකීර්ණ පරිපථවලට යන්න කලින් අපි මූලික ඉලෙක්ට්‍රොනික උපකරණ ගැන දැනගෙන ඉන්න ඕනේ. ඒ නිසා අපි මේ ලිපියෙන් දැනට බහුලව භාවිතා වෙන ඉලෙක්ට්‍රොනික උපකරණ කීපයක් ගැන ඉගෙනගෙන ඉමු. ඉස්සෙල්ලාම බලමු කොහොමද Breadboard එකක් පාවිච්චි කරන්නේ කියලා...

Breadboards

මේ තියෙන්නේ අපිට බහුලවම හමුවෙන ජාතියේ Breadboard එකක්.

A Normal Breadboard

මේ හැම Breadboard එකකම Power Lines සහ අපේ උපකරණ සවිකරන්න වෙනමම කොටස් තියෙනවා. Breadboard එකක් ඇතුලෙ තියෙන Connectionsමේ විදියයි

Breadboard එකක සාමාන්‍ය පෙනුම

Breadboard එක ඇතුලේ connections...

Inside a Breadboard

ඔය කොළපාට ඉරිවලින් පෙන්වන්නේ Breadboard එක ඇතුල සම්බන්ධ වෙන විදියයි. මේවා වලින් දෙපැත්තේ තියෙන දිග Connections දෙක අපි සාමාන්‍යයෙන් යොදාගන්නේ Power Lines විදියටයි. මේක වැඩකරන විදිය අපි ඉදිරියට Projects කරනකොට තවදුරටත් ප්‍රායෝගිකව බලාගන්න පුලුවන් වෙයි. :)

Resistors (ප්‍රතිරෝධක)

සාමාන්‍ය Axial-Lead type ප්‍රතිරෝධකයක්

Resistor එකක් කියන්නේ පරිපථයක් තුල ධාරාව ගලා යෑමට බාධාවක් ඇති කරන උපාංගයක්. අපි හදන ( හෝ දකින ) සෑම පරිපථයකම වගේ අනිවාර්රයෙන්ම ප්‍රතිරෝධක අඩංගු වෙනවා. ප්‍රතිරෝධකවල අගය මනින්නේ Ohm (Ω) කියන ඒකකය යොදාගෙනයි. සාමාන්‍යයෙන් අපි භාවිත කරන ප්‍රතිරෝධක වල අගය 1Ω සිට 1MΩ දක්වා පමණ වෙනවා. ( 1000Ω = 1KΩ , 1000KΩ = 1MΩ ) ප්‍රතිරෝධක වල අගය සටහන් කරලා තියෙන්නේ විශේශ වර්ණ කේත ක්‍රමයකට අනුවයි. මේ ක්‍රමයට අනුව 0-9 දක්වා අගයන්ට වර්ණ ලබා දී තියෙනවා. මේ ක්‍රමයට අනුව ප්‍රතිරෝධකයක වර්ණ වළලු 4ක් තියෙනවා ( 5ක් තියෙන ප්‍රතිරෝධකත් තියෙනවා. නමුත් ඒවා අපිට වැදගත් වෙන්නේ නෑ ) මේ වළලු වලින් ප්‍රථම හා දෙවන වළලු වල අගය කෙලින්ම ගන්න පුලුවන්. නමුත් 3න් වන වර්ණ වළල්ලේ අගය වෙනුවට අපි එම අගයට අදාල ගුණාකාරයෙන් පළමු අගය වැඩි කරන්න ඕන. හතර වෙනි වළල්ලෙන් පෙන්වන්නේ Tolerance එකයි. ඒ කියන්න රෙසිස්ටරයේ දක්වා ඇති අගය වෙනස් වීමේ ප්‍රතිශතයයි. අපි උදාහරණ කීපයක් අරගෙන බලමු. ඉස්සෙල්ලාම පහත දැක්වෙන වර්ණ වගුව බලන්න.

උදා :- මේ පහළ දැක්වෙන රෙසිස්ටරය බලන්න.

පළවෙනි වළල්ලේ අගය = 5 ( Green )
දෙවැනි වළල්ලේ අගය = 6 ( Blue )
තුන්වැනි වළල්ලේ අගය = 1 (Brown )
සිවුවැනි වළල්ලේ අගය = ± 5% ( Gold )

සම්පූර්ණ අගය = 56 x 10^1= 560Ω ± 5%

( මෙහිදී පළවෙනි වළල්ලේ අගය හා දෙවැනි වළල්ලේ අගය කෙළින්ම එක ළඟ ලිවිය යුතුයි. ඉන්පසු 3න් වැනි වළල්ලට අදාල ගුණාකාරයෙන් එම අගය ගුණ කළ යුතුයි. )

උදා 2 :- මේ ප්‍රතිරෝධකයේ අගය ගණනය කරමු.

පළවෙනි වළල්ලේ අගය = 4 ( Yellow )
දෙවැනි වළල්ලේ අගය = 7 ( Violet )
තුන්වැනි වළල්ලේ අගය = 3 ( Orange )
සිවුවැනි වළල්ලේ අගය = ± 5% ( Gold )

සම්පූර්ණ අගය = 47 x 10^3= 47000Ω = 47KΩ ± 5%

රෙසිස්ටරයක සම්මත පරිපථ සංකේතය විදියට පහත දැක්වෙන සංකේත දෙකම භාවිතා කරන්න පුලුවන්.

Transistors (ට්‍රාන්සිස්ටර)

විවිධ වර්ගවල ට්‍රාන්සිස්ටර

අපිට විවිධ පරිපථ සාදද්දී තවත් නැතුවම බැරි දෙයක් තමයි ට්‍රාන්සිස්ටර කියන්නේ. ට්‍රාන්සිස්ටරයකට ස්විචයක් විදියට හෝ ධාරා වර්ධකයක් ලෙස ක්‍රියා කරන්න පුලුවන්. අපි මේවායේ ප්‍රායෝගික භාවිත ගැන ඉදිරියට කථා කරමු. ඕනම ට්‍රාන්සිස්ටර්යක අපිට Pins තුනක් දැකගන්න පුලුවන්. මේ Pins නම් කරන්නේ පාදම ( Base - B ), විමෝචකය ( Emitter - E ) හා සංග්‍රාහකය ( Collector - C ) කියලයි. මේවාරින් අපි පාදමට ලබාදෙන ධාරාවක් හරහා සංග්‍රාහකය සහ විමෝචකය අතර ගලා යන විදුලිය පාලනය කරන්න පුලුවන්. අපි පාවිච්චි කරන ට්‍රාන්සිස්ටර NPN හා PNP ලෙස ප්‍රධාන කොටස් දෙකකට වර්ග කරන්න පුලුවන්. මේ වර්ග දෙක අතර තියෙන එකම් වෙනස නම් NPN ට්‍රාන්සිස්ටර වල ධාරාව ගලා යන්නේ C සිට E වෙතටයි. නමුත් PNP ට්‍රාන්සිස්ටරයක ධාරාව ගලා යන්නේ E සිට C වෙතටයි. මම මේවා ගැන මෙතනදී වැඩිය කථා කරන්න යන්නේ නෑ..

TO-92 ප්‍රමාණයේ ට්‍රාන්සිස්ටරවල Pin සැකැස්ම හා අදාල පරිපථ සංකේත

Capacitors (ධාරිත්‍රක)

විවිධ වර්ගවල ධාරිත්‍රක

ධාරිත්‍රක භාවිතා වෙන්නේ පරිපථයක තාවකාලිකව විදුලිය රඳවා තබාගැනීමටයි. අපිට සරලවම ධාරිත්‍රයකයක් Rechargable Battery එකක් විදියට හඳුන්වන්න පුලුවන්. එකම වෙනස වෙන්නේ මේකේ ධාරිතාවය සාපේක්ෂව ඉතාම අඩු වීමයි. ( ඔයගොල්ලෝ අනිවාර්රයෙන්ම දැකලා ඇති ඔය Phone Chargers එහෙම ප්‍රධාන විදුලියෙන් විසන්ධි කරපු ගමන්ම ඒකේ තියෙන LED එක නිවෙන්නේ නැති බව. ඒ LED එක ටික වෙලාවක් දිගටම දැල්වෙනවා. එහෙම වෙන්නේ ඒ එක ඇතුලේ තියෙන ධාරිත්‍රක වල Charge එක නිසයි ) ධාරිත්‍රක ප්‍රායෝගික භාවිතයේදී බැටරියක් වගේම ධාරාවන් සුමටනය කීරීමටත් භාවිතා වෙනවා. මේවායේ ප්‍රායෝගික භාවිතයන් අපි ඉදිරියට විමසා බලමු. පහල දැක්වෙන්නේ Capacitors වල සම්මත පරිපථ සංකේතයි.

Diodes

Diode එකක් කියන්නේ මූලිකවම එක පැත්තකට පමණක් ධාරාව ගලා යෑමට ඉඩදෙන ඉලෙක්ට්‍රොනික උපාංගයක්. LED කියන්නෙත් Diodes වර්ගයක්ම තමයි. Diodes භාවිතා කරලා AC --> DC බවට පත්කිරීම වගේ දේවල් කරන්න පුලුවන්. මේ තියෙන්නේ Diodes වලට අදාල පරිපථ සංකේතය.

Relays (පිළියවන)

Relays!

Relays භාවිතා කරලා අපිට කුඩා ධාරාවක් මඟින් ඉතා විශාල ධාරාවක් පාලනය කරන්න පුලුවන්. ට්‍රාන්සිස්ටර වලට වඩා මේවායේ තියෙන විශේශත්වය වෙන්නේ Relays මඟින් අපේ පරිපථය Load එකෙන් ඒකලිත (Isolate) කිරීමයි. ඒ කියන්නේ අපිට Microcontroller එක මඟින් සාමාන්‍ය 230V AC බල්බයක් දැල්වීමට අවශ්‍ය වුනොත් Relay එකක් භාවිත කරන්න පුලුවන්. එතකොට අපේ පරිපථය හා බල්බය එකිනෙකින් සම්පූර්ණයෙන්ම වෙන්වෙනවා. එතකොට බල්බයට යන විශාල ධාරාව නිසා අපේ Microcontroller එකට හානිවීම වැලැක්වෙනවා. මේවා භාවිතයත් අපි ඉදිරියේදී කරමු.

A Circuit to Drive an AC Device using a Microcontroller

අද පෝස්ට් එකෙන් මම කථාකරන්න බලාපොරොත්තු වෙන්නේ මේ උපාංග ටික ගැන විතරයි. මේවාට අමතරව අපිට ඉලෙක්ට්‍රොනික ලෝකයේදී හමුවන උපාංග ඉතා විශාල ප්‍රමාණයක් තියෙනවා. අපි ඉතින් ඒවා ගැන අදාල තැන්වලදී කථාකරමු...ඕනම ප්‍රශ්නයක් තියෙනවනම් යටින් කමෙන්ට් කරලා අහන්න පුලුවන්...

එහෙනම් අපි කැපුනා! ඊළඟ පෝස්ට් එකෙන් නයිට් රයිඩර් පරිපථය හදමු.. :D